政壇：新思維謀攻立會踢走低「智」捧哪吒

參選立法會新界東補選落敗嘅新思維黃成智，曾經在選舉論壇剖白：「如果你唔鍾意黃成智，我都希望你投畀方國珊」，點知敗選不夠兩日，竟然一語成讖，本報聽聞新思維內部不滿黃成智今次低票落敗，得票幾乎係「哪吒」方國珊嘅一半，為咗整合中間路線票源及提高勝算，新思維有意學人做「中間共主」，與民主思路、方國珊等同路人協調，劍指新界東、新界西及香港島，為九月立法會選舉力爭至少一席鋪路。

黃成智同方國珊喺今次新界東補選得票率加起來僅約百分之十二，兌番票數，即使出戰九月大選亦僅能奪一席。新思維內部分析，為避免九月攬炒，初步計劃以黃成智退出，利誘方國珊合作，並藉方國珊嘅全港知名度，為有意出戰新界西嘅新思維副主席鄭承隆拉票；另據悉民主思路亦有意派年輕代表出選香港島，新思維願意配合支持。

本報曾問過民主思路同埋方國珊，民主思路表示未同新思維商討，但將來無可避免要派人進入議會。方國珊就話補選睇到自己的外區票源有增長，至於有否條件合作，她指要時間平復心情先喎。