政壇：大狀火併鍵戰
「拉布」多時嘅《二○一四年版權（修訂）條例草案》至今未見曙光，商務及經濟發展局局長Greg蘇錦樑日前設下死線，意味草案勢將面臨終結拉倒。
大律師公會尋日再次喺限期之前嘥口水，發表立場書力撐草案，仲點名駁斥「鍵戰」鍵盤戰線早前對公會嘅批評係以偏概全及斷章取義，存在謬誤，呼籲各方捨棄對立抗爭係態度，研究可行方案。今次由譚允芝領導嘅大狀公會對上鄺頌晴任發言人嘅鍵戰，由理據到措辭、甚至案例都火藥味十足，足見版權例嘅爭拗謬誤好多，大家真係要睜大雙眼。
Greg蘇「就此作罷」嘅警告發出後，鍵盤戰線翌日逐點反駁大律師公會早前嘅立場書。
不過，事隔不足一星期，公會轄下知識產權委員會尋日再就草案在法例凌駕合約條款、知識產權與財產權、公平處理與公平使用、個人用戶衍生豁免、共享創意及刑事責任六方面，逐點反駁鍵盤戰線，火藥味甚濃。
籲易地而處 棄對立抗爭
公會強調版權是受法例保障嘅私有產權，應該受尊重，但並非無止境而不受限制，包括是否進一步縮窄版權持有人嘅控制權，「無償使用」對版權持有人又是否公平，假如控制權被收窄，又如何保障版權價值不受損害等，這些問題對版權持有人及二次創作人同樣切身，呼籲各方可以易地而處，捨棄對立抗爭嘅態度，以務實及互諒互讓態度，研究出公平互利的方案，讓版權條例可以向前邁進。
不過，講多無謂，「慢必」陳志全、陳偉業同埋梁國雄等人連「拉布」更表都已經出台，慢必仲表明會再提休會待續動議，勢要拉死草案，看來大律師公會和鍵盤戰線都可以去抖吓，毋須再駁來駁去喇。
