獵狗終須山上喪 夢熊難免陣前亡

話說劉夢熊接受廉署調查期間，涉嫌去信特首及廉政專員要挾中止相關調查，被控意圖妨礙司法公正罪成，判囚十八個月，仲要洗淨籮柚即時入監添。佢老哥聞判後，當堂■過火屎，喺犯人欄內大叫「歷史將宣判我無罪」，仲話「惡有惡報、善有善報、若然不報、時候未到」。話時話，歷史會否判佢無罪，尚係未知之數，但今劑鋃鐺入獄，真係唔慌唔「現眼報」咯。

最好笑嘅係，向來出口成文、金句多多嘅夢熊大師，今次都不忘苦中作樂，吟詩作對。佢自抬身價，攀比為晚清先烈譚嗣同，引用《獄中題壁》詩句「我自橫刀向天笑，去留肝膽兩崑崙 」明志，真係唔知就嚇死，知嘅即刻笑到碌地。

係人都知，譚嗣同係赫赫有名嘅「戊戌六君子」之一，因為變法失敗慷慨赴義，絕對係留取丹心照汗青嘅大英雄。反觀劉夢熊，不過因為沽名釣譽，求官不遂繼而搞到身敗名裂，嚴格而言，頂多只係一隻小狗熊嚟咋。人比人比死人，英雄比狗熊，更加係蚊髀同牛髀，完全冇得比啦，盞淪為網民茶餘飯後嘅笑話咋。

其實講起夢熊大師嘅前塵往事，亦未嘗唔係一部不可多得嘅勵志催淚小說，佢由「只有一條泳褲」從內地游水偷渡來港，由工廠打工仔，再涉足商界從事期貨及外匯買賣，做到有聲有色，本來可以搵夠疊埋心水歎世界，而小說至此亦大團圓結局。可惜吖，佢老哥官癮發作，三年前介入特首選舉，扮演「造王者」，希望獲取政治回報，除咗要做政協常委，晉升正部級行列，仲想出任行政會議成員，實行「一國兩制」通吃。即係咁，佢老哥希望成為另一個呂不韋，奇貨可居，點石成金，可見人心不足蛇吞象，自古皆然。

結果係點？有辦你睇，呂不韋最後咪畀秦王政伸埋一邊，飲鴆自殺囉。而劉夢熊亦唔好得幾多，唔止常委夢碎，連政協委員都搣埋柴，依家仲要打入黑牢添，足證「官癮」兩個字，確係累人不淺呀。

正如歌仔都有得唱，命裏有時終須有，命裏無時莫強求。寄語夢熊大師，嘢可以亂食，絕命詩唔可以亂吟，不如改為「獵狗終須山上喪，夢熊難免陣前亡」，係咪恰如其分得多呢？叮!