城中鏡：蔡一鳳品牌巴黎插旗
亞視前高層盛品儒嘅太太蔡一鳳，今年毅然辭去塞班島度假村執行官嘅高薪厚職，一心留港陪伴老公趕造猴B，另方面佢又要湊另一個「BB」，旗下嘅珠寶品牌，今年計劃巴黎插旗兼開設私人會所，喺巴黎呢個浪漫時尚之都，建立最豪嘅生活品味。
蔡一鳳今年毅然辭去塞班島度假村執行官嘅高薪厚職，一心留港陪伴老公趕造猴B。
新一年，蔡一鳳嘅大計多多，佢無懼歐洲恐襲嘅陰霾，其法國珠寶品牌Marvella將於五月，喺法國開店，新店已進入最後倒數階段，問佢有冇學定法文作準備，佢話：「之前都學過，不過好多畀番晒老師，好在法國朋友多，會喺嗰邊請啲法國同事幫手。」同時，佢又計劃開設大型私人會所，正物色好地皮，除展示珠寶首飾外，仲會陸續由珠寶延伸嘅一系列家居用品如香薰、蠟燭等，將人生應有嘅享樂態度表現出來，「自己都幾奄尖，用嘅嘢要指定牌子，要指定顏色，好似屋企嘅毛巾我指定要啡色。我覺得一日做嘢咁辛苦，返到屋企要全部都好舒服，所以覺得屋企用嘅嘢好緊要。」投資金額，逾八位數字。
