政壇：搞搞政：阿忠 郭偉強乜都扯標時

研增經濟顧問 無端插入

政府經濟顧問陳李藹倫解釋，現時佢需要親自出席十二個政府高層次委員會，每年涉及七十個會議，直接向司局長作高層次專業分析。如果設有副手，就可由副手處理日常工作同經濟分析，咁佢就可親自領導如競爭力研究、分析等極需加強嘅項目。除要求開設副政府經濟顧問外，仲想保留首席經濟主任三年，以便加強政府喺人口、扶貧及福利政策範疇嘅分析同研究。

街工梁耀忠提問時，無端端扯到標準工時，問政府有冇就長工時而導致勞工界身體勞累、醫療負荷等無形經濟，作出詳細研究及評估？陳太無好氣咁回應，呢啲社會因素好難量化成為經濟數據。工聯會郭偉強就直言，委員會提供嘅數據係為商界護航咁話。

社民連「長毛」梁國雄同白鴿黨涂謹申竟又扯到去首席經濟主任會唔會調去搞「一帶一路」。陳太話每一組首席經濟主任都有各自嘅嘢要處理，就算要有人研究「一帶一路」，都只會喺內部調配，唔會隨意調任他組嘅首席經濟主任。但係阿涂仍然死咬不放，問條文有冇列明唔畀咁調，最後要陳太承諾咗唔會咁做，先至罷休。