政壇：教協改選 激進對戰溫和派
香港教育專業人員協會理事會同監事會每兩年換屆一次，最新一次換屆喺本月舉行，繼一四年監事會改選內訌，出現被視為教協溫和派嘅張文光，同不滿教協愈趨保守作風嘅韓連山領軍對壘嘅場面；事隔兩年後嘅今日，兩人分別組成十九人團隊對陣，延續喺剛落幕嘅立法會新界東補選，主流泛民同激進派嘅激戰。
張文光（圖）同韓連山團隊，再次喺教協監事會對壘。（資料圖片）
張文光同韓連山（圖）團隊，再次喺教協監事會對壘。（資料圖片）
據教協發出嘅新聞稿顯示，合共有三十八人參加監事會選舉，韓連山今年就再接再厲，包括佢本人在內，「進師盟」共派出十九人參選監事會，兩年前同佢一齊當選監事嘅「進師盟」成員戚本盛、吳美蘭、孔令暉、施安娜等人亦再度挑戰監事一職，但成員郭思齊就冇再角逐連任。
張文光陣營組成嘅「薪火相傳」，今年亦再次組成十九人團隊爭取全數成為監事，除咗張文光本人，陳漢森、徐漢光等人再度披甲上陣，張韓兩大陣營再次短兵相接，勢必擦出新火花。
至於教協理事改選，現任會長馮偉華再次組閣角逐連任會長，四名候選副會長包括教育界議員葉建源等。
