成也網絡，敗也網絡。係人都知，二十一世紀係網絡嘅年代，資訊透過網絡快速流通，為大家帶來方便。不過咁，有利就有弊，網絡方便人類嘅同時亦製造唔少罪案，尤其係商業網絡犯罪，搞到唔少企業頭都痛埋。

一項全球經濟犯罪調查顯示，港澳地區機構過去二十四個月內曾經歷經濟犯罪嘅比例高達兩成一，較前年同一調查上升五個百分點，而曾經歷經濟犯罪嘅受訪者當中，更有五成表示曾遭遇網絡犯罪，較前年調查大幅上升一成三，都咪話唔誇張。

事實擺在眼前，網絡犯罪唔止急增，仲佔經濟犯罪一半嘅比重，唔到當局唔正視o架。所謂網絡犯罪，最常見係犯罪分子利用編碼、加密、解碼技術或工具，透過互聯網進行嘅刑事犯罪活動。呢，前一排不斷湧現嘅假銀行網站，咪就係網絡犯罪嘅典型囉。

由於網絡犯罪愈演愈烈，全世界嘅政府都唔敢輕視，好似中美兩國咁吖，去年底成立熱線機制，加強合作打擊。港府話就話成立網絡安全及科技罪案調查科，但相比日新月異嘅網絡罪案，而且往往涉及跨境進行，單靠一個部門打擊未必足夠o架。尤其香港係國際金融中心，萬一網絡犯罪肆虐，營商環境惡化，仲邊有人放心來港投資同做生意喎。

可惜吖，港府弱勢無能，連成立創新及科技局都要耗費三年半時間先至勉強過關，到底有冇魄力打擊網絡罪案，真係好令人懷疑。大家有眼見o架，淨係版權修訂條例草案咋，受制於反對派議員不斷拉布，大有跪低收場之勢。呢，商經局局長蘇錦樑話喎，如果今個星期仍然未能通過修訂，當局就會「作罷」。港府向反對派舉手投降，咪就係對網絡犯罪舉白旗認輸囉。

大家都知，家陣網絡侵權嚴重，而本港法例落後，不足以保護版權持有人嘅權益，修訂版權條例草案根本係應有之義。點知港府一直大安旨意，掉以輕心，搞到被反對派上綱上線，仲冠上「網絡廿三條」惡名，唔作罷都唔知點收科。所以話，港產官僚庸碌無能，簡直為虎作倀。

一節見則百節知，港府連唔涉及政治爭議嘅版權修訂條例草案都鎩羽而歸，遑論其他更棘手嘅問題，社會愈來愈亂就係咁解。再咁落去，國際金融中心地位難保，網絡犯罪天堂就有之，叮！