城中鏡：梁美芬埋枱食飯

梁美芬話河北重男輕女，過年時女人只可以煮飯，但唔畀埋枱食飯，但因佢係香港人故有特別尊重，不過依家鄉下都多咗事業女性，教育程度較高，亦多咗女性可埋枱食飯。講開過農曆新年，佢話細個時屋企做小生意，父母有啲迷信，年初七前全家唔准洗頭，佢就曾為咗堅持洗頭同屋企人嗌交，搞到要偷偷洗頭。

香港客屬總會執行主席曾智明早前喺新春茶敍上亦提到客家人嘅傳統，佢教大家一句客家流傳嘅諺語，就係「客家女人大力、細食、勤力、分開食」，又指客家女人通常持家有道。咁客家男人又點呢？佢就話「女人落田男人讀書當兵」，屋企永遠有兩支棍一支筆，比喻客家男人能文能武喎。

梁亮勝堅持傳承客家話

本身係客家人嘅廣東社團總會常務副主席梁亮勝，就希望港人唔好忘記自己家鄉，好似佢兩個女雖自小喺加拿大求學，但佢一直堅持大家要用客家話溝通，以傳承客家文化。

早前喺一個團拜活動上遇到發展局局長「波波」陳茂波，佢話細個時比較窮，過年都冇錢買新衫，雖然依家家境好咗，但佢都講笑話啲仔女都係冇得買新衫，皆因「老竇都冇，個仔點會有呀？」認真搞笑。