政壇：搞搞政：九龍東三路失票 KK選情凍過水
九月將會係立法會換屆選舉，據聞九龍東直選選區將陷入大混戰，當中以現任工聯會議員KK黃國健形勢最危。KK喺一二年參選九東直選時已贏得好驚險，選舉當晚仍落後對手，最終決定用傳統拉票策略，到老巢黃大仙上邨大舉「洗樓」，先能夠成功連任。但呢招相信喺九月選舉未必奏效，皆因佢喺三方面流失票源。首先講工聯會嘅傳統鐵票，經歷數十年嘅變遷同舊區重建搬遷，以及部分年紀較大嘅選民過身，喺未能開發新票源下，選票慢慢流失，成為其中一個致命傷。
工聯會另一票源係嚟自東九龍居民委員會。據聞自工聯會陳婉嫻舊年放棄連任黃大仙區議員後，已無機會再角逐超級區議會議席，除非佢「翻閹」再出戰九東，否則幾可確定佢將會「退休」。有地區人士坦言，嫻姐唔參選，亦毋須再「畀面」支持KK，據聞東九龍居民委員會嘅區議員「樁腳」，將會改為支持獨立議員謝偉俊同盛傳接替建仔陳鑑林九東議席嘅觀塘區議員柯創盛。由黃大仙同觀塘區議員組成嘅「創建力量」，據聞亦已決定全力支持謝偉俊，意味佢好大機會順利連任，再加上柯創盛接棒，建仔肯定全力谷票力保議席，喺多方面扯票下，KK可謂岌岌可危。
工聯會議席恐六變二
聽聞工聯會最近曾開過一次內部會議評估選情，若連同其他選區也面對類似危機，加上超級區議會議席都保唔住，最壞打算係輸剩兩個勞工界功能界別議席。如果呢個評估成真，工聯會就要面臨由六個議席變為兩個議席，告別議會內嘅輝煌時期。
