政壇：中醫下戒酒令 洪為民瘦十磅
早前見到前海管理局香港事務首席聯絡官Witman洪為民，見佢清減咗喎，唔通因為過年忙得滯？原來佢早前睇過中醫，並聽勸喻開始戒酒，一個月就減咗十磅，成效好顯著。
洪為民戒酒後，短短一個月時間內就瘦咗十磅。
Witman話早喺個幾月前，有次連續兩晚要飲酒應酬，翌日諗住睇吓中醫清清腸胃調理吓身體，點知中醫一見到佢就耍手擰頭，語重心長好認真咁話，再咁落去好快就見佢唔到喎！中醫又下令佢即刻戒酒，佢見事態嚴重梗係要聽中醫講啦，誰知戒咗酒一個月之後仲有意外收穫，估唔到咁短時間內就瘦咗十磅。
講起前海嘅發展狀況，佢話希望二○二○年可以達到六十五萬就業人口同十五萬居住人口，並吸引更多專業人才到前海發展，例如會計師等。現時佢每周大約去前海工作四日，但每次都盡量即日來回，晚上同親友約會。
