政壇：學民眾叛親離 「鋒」光不再
相信大家仲記得，四年前反國教一役令學民思潮打響名堂，佔領行動之後更加同發起佔領嘅學聯平分秋色，風頭一時無兩。不過，外表風光嘅學民就多次出現骨幹成員退出問題，繼前發言人張秀賢、劉貳龍等人宣布退會或退任，學民前發言人黎汶洛尋日亦發聲明，坦言因為學民內部對佢喺立法會新界東補選中，為公文袋楊岳橋助選而表示不信任，所以決定退出學民。數埋數埋，喺黎汶洛退出之後，學民活躍嘅骨幹成員好似得番黃之鋒同周庭，真可謂眾叛親離，而學民內部嘅路線之爭亦更見明顯。
死撐無損出戰立會
學民之前曾發聲明，話今次新界東補選唔會支持任何一位候選人，但成員之一嘅黎汶洛就多次幫楊岳橋站台。黎尋日一見傳媒，就坦言自己已經退出學民，又話自己之前雖已退任發言人，但發言人嘅形象太深入民心，自己幫楊助選會被誤會為學民官方取態，加上有人對佢擺明車馬撐楊有疑問，故決定退出學民，全力為楊拉票。佢話黃之鋒都有挽留過，但佢覺得無謂左右逢源，仲話同黃仍有合作空間。
據知，今次黎汶洛退出主要原因，係學民內部對支持溫和泛民主派楊岳橋定係激進本土梁天琦有唔同取態。如今黎退出，對於學民同學聯組黨，以及佢年底參與立法會選舉有無影響呢？雖然黎講明話無，但支持唔同候選人，其實都代表佢哋對溫和定激進嘅唔同取態，如果唔可以整合組織內嘅路線分歧，要成功組黨，談何容易呀！
