如果話前人種樹，後人乘涼，咁前人種禍，後人一定遭殃喇。好似高鐵工程咁吖，一波多折，拖拖拉拉，當中固然有好多原因，而西九總站嘅巨型天幕設計複雜，工程難度超高，亦係主要原因之一，呢啲咪就係前朝留低嘅蘇州屎囉。

係人都知，前特首曾蔭權爵士出晒名好大喜功，當年對西九巨型天幕設計情有獨鍾，企圖霸王硬上弓，卒之引發單一招標爭議，被指「隻手遮天，官商勾結」，結果要推倒重來，唔止浪費時間，而且浪費金錢，成個西九計劃更因嚴重超支而面臨爛尾添。

好嘞，西九文化區嘅天幕搞唔成，估唔到高鐵總站東施效顰，以巨型天幕作招徠，結果騎虎難下。不可不知，天幕工程屬於超高難度，包括要安裝四千幾塊玻璃，由於每塊玻璃大小弧度不同，安裝過程非常複雜，就算順風順水亦要一年時間，只要其中一塊有問題，都要花兩三個星期重做，加上其他阻滯，工程一誤再誤，成本一漲再漲，高鐵究竟可唔可以喺二○一八年第三季通車，只能望天打卦咋。

唔係誇張o架，西九總站玻璃天幕麻煩多多，曾經因為原先設計可能抵受唔到颱風嘅力度，導致工程一拖再拖。有人可能會問，既然天幕工程咁複雜咁麻煩，點解一定要採用呢種設計呢？呢啲咪就係曾爵士嘅好帶挈囉。正如有立法會議員話齋，前朝政府「唔知留低幾多蘇州屎」，造成今日高鐵工程嘅困局。

心理學大師佛洛伊德講過，用暴露身體等方式而獲得興奮及滿足嘅人，是為暴露症患者也。曾爵士對天幕設計情有獨鍾，可能就係「暴露症」作怪，佢當年以超筍價廉租深圳禮賓府，逾萬呎複式豪宅連天台，除咗有空中花園，仲有天幕玻璃屋及落地玻璃嘅按摩浴池添，你話佢究竟想滿足乜嘢心理吖？

講番高鐵呢筆，截至上月底話就話已完成逾七成七工程，較預期嘅七成半稍快，但如果總站嘅天幕工程出現問題和阻滯，隨時拖累整體工程進度。再講吖，由於立法會遲遲未通過追加撥款，高鐵工程正面臨缺水危機，如果本周末或下周一嘅死線前仲未通過，隨時爛尾都似。

所以話，近年香港頭頭碰着黑，冇一項工程可以順利進行，唔係港府施政無能，就係政客添煩添亂，再咁落去，香港想唔死都幾難，叮！