城中鏡：暴亂保險買安心
依家全球經濟放緩，本地零售商面對持續挑戰，加上人民幣貶值，奢侈品銷情受到影響，加上早前旺角暴亂，確係雪上加霜，開舖做生意認真慘情。早前香港潮州商會新春團拜上，國際專業保險諮詢協會會長羅少雄就話，有架的士喺暴亂中被毀壞，奈何暴動冇得賠償；而一般舖頭買嘅保險亦只包意外，騷亂或暴動都不獲賠償，加上香港發生暴亂嘅機會好細，所以好多人都無買騷亂或暴動嘅保險。
羅少雄建議生意人買多份騷亂或暴動嘅保險，以防萬一。
馬僑生（右）面對小巴生意挑戰，未知父親馬亞木有冇錦囊給阿仔呢？
胡楚南（右）指人民幣貶值對K金生意影響唔大。左為潮州商會會董張詩培。
「K金大王」未懼人仔貶值
羅少雄建議生意人買多份騷亂或暴動嘅保險都無壞，因為發生機會太低，所以保費唔會好貴，主要視乎業務性質同範圍，當然奢侈品舖頭會貴啲啦，叫做買個安心。雖然外界大致睇淡今年經濟環境，但外號「K金大王」嘅香港潮州商會會董胡楚南就認為，人民幣貶值對K金生意影響唔大，事關K金唔算好貴，價錢一般人都負擔得起，反而一啲售賣名牌手袋、鐘錶等名店就可能會面對收縮嘅情況。不過，佢話公司暫時唔會特別增聘人手，實行精英制。
同場嘅「新小巴大王」馬僑生都話，自小巴合法化以嚟，都未見過旺角暴亂呢類情況，又話喺普天同慶嘅日子搗亂係不可接受。佢又提到小巴司機年紀開始老化，好多後生仔都唔肯入行，令到依家最少一成小巴路線開唔足，真係唔敢想像幾年之後，情況會惡化到乜嘢程度。佢又話以前考大巴牌會畀多個小巴牌，但現時要讀一個課程，先發出駕駛牌照，再次促請放寬牌照制度，或有限度輸入外勞，改變局面。
