城中鏡：探訪老友記 陳細潔展善心
「鯊魚女」陳細潔尋日出席保良局活動時透露，佢喺農曆新年前，去咗瑞士同英國半個月，佢話：「去瑞士滑雪，之後再去英國探我姪仔女，叉足電返香港做嘢。」佢透露現正忙於籌備保良局嘅活動，作為地區安老服務計劃節目籌委會主席嘅佢，話剛完成咗慈善步行，今年將有十多項籌款活動。問佢會唔會親自探訪老人？佢話：「成日都會，除咗同保良局，我自己公司都有進行探訪，探吓老友記，送啲嘢畀佢哋。因為我自細係嫲嫲湊大，所以對長者特別關注，會花更多時間探佢哋。」
陳細潔農曆新年前，去咗瑞士滑雪。
汪明荃以一身「Pink Lady」造型，於活動擔任安老大使。
「汪阿姐」汪明荃就以一身「Pink Lady」造型現身，佢話為呢個活動擔任安老大使，更會即場獻唱金曲。問到佢同老公羅家英日前點樣過元宵節？佢笑言同身在內地嘅對方以視像通話「傳情」，佢話：「我哋會視像，互相問候！而新年去咗日本玩，我哋post咗好多相出嚟喇！」傾到佢即將亮相顧嘉煇嘅慈善演唱會，佢話：「排練好順利，我尋晚先同秋官（鄭少秋）排練完。」
