被港獨人士稱做「國師」嘅本土派學者陳雲,尋日喺社交網站宣布即將「撤離」其任教多年嘅嶺南大學。

陳雲原名陳雲根,喺嶺大中文系任職助理教授,佢尋日凌晨喺社交網站話:「我已經搬空書籍,預備撤離嶺南大學。不日回校拍攝教員室的搬空照片給大家看。」佢又引用《馬太福音》嘅金句,自言會喺離開時喺大學校門「把腳上的塵土跺掉」,暗批嶺大容不下佢嘅主張同言論。《東網》將有關消息傳開後,陳雲喺社交網站再度留言,留下「耐人尋味」四字,之後再留下「另謀出路」,莫非係自己「劈炮唔撈」?本報截稿前,仍未能聯絡上陳雲回應。

校長警告信 促「慎言慎行」

陳雲著有多本有關本土同港獨思潮嘅書籍,佢亦曾喺佔領期間,親臨旺角佔領區,教導佔領人士用行李篋改裝成盾牌。佢舊年初被警方以組織非法集結罪名拘捕,但至今仍未被檢控。而警方早前上門拘捕一名旺角暴亂參與者時,曾向傳媒展示喺屋內搜到嘅一本陳雲著作。

舊年十一月,網傳嶺大校長鄭國漢喺舊年三月去信陳雲,批評佢近年部分言行與學者身份相悖,已超言論自由底線,違背大學教授應有嘅基本操守,嚴重影響嶺大校譽,敦促陳雲「慎言慎行」,回歸教學及學術研究,否則「後果自負」。當時陳雲曾質疑,若鄭國漢不滿其言論可開會調查,而非發出「恐嚇信」打壓言論自由,聲言今年八月約滿後唔會同嶺大續約,但嶺大則指發警告信,係因為陳雲喺舊年三月曾公開發表一則對女性帶有嚴重侮辱成分嘅言論,引起各界批評。

現時距離約滿仲有半年,佢忽然宣布「撤離」,究竟係佢自己辭職?抑或被提早解約「炒魷魚」呢?究竟佢何去何從呢?係咪正如網民回應,指佢走向「建國之路」呢?

第一手消息請下載on.cc東網iPhone/iPad/Android/Windows Phone Apps