政壇：證監15年變遷大 沈聯濤化身學者

話說兩人以前係上司同下屬關係，沈聯濤九八年做證監會主席，直至○五年離任，係歷來坐得最耐嘅主席。

歐達禮喺○一至○四年出任證監會企業融資部執行董事，所以歐達禮尋日上台介紹沈聯濤時，話佢係自己十五年前嘅「波士」，就係咁解。

進軍IOSCO 歐達禮銜頭高

十五年，人事變遷的確可以好大。沈聯濤冇做證監會主席後，做咗中銀監首席顧問，近年喺香港更專職做學者同研究工作，依家係香港大學亞洲環球研究所特聘傑出研究員。

至於歐達禮，一一年重返證監會後更上一層樓，做咗行政總裁；而喺國際層面，歐達禮更加步步高陞。

話說佢喺國際證監會組織（IOSCO）銜頭愈坐愈高，大家可能唔太熟IOSCO，IOSCO其實「輩分」好高，係各地證券監管機構進行國際性合作嘅重要組織，亦係公認嘅證券業國際標準釐定機構。