政壇：「健」談六七暴動 專搞男女關係
呢排不時有人將旺角暴亂同六七暴動扯上關係，立法會前議員劉健儀回憶當年剛巧就讀香港大學，更加入學生會，擔任康樂秘書，實際上係「超級媒人」專搞男女關係，但強調當年為校內同學牽紅線，名副其實係「促進男女關係和諧」，絕不暴力。
劉健儀（右）指當年讀港大做「超級媒人」，張宇人話自己依家係「兩蚊張」。
劉健儀尋日出席新春團拜，回憶當年六七暴動期間加入學生會，係校內活躍分子，不但舉辦多場舞會，連「港大小姐」都由佢一手催生。但佢慨嘆「賣花之人插竹葉」，當年未能為自己牽紅線。
同場嘅立法會飲食界議員張宇人早前傳出遇傘兵挑戰連任，但佢笑言無懼傘兵，反而「怕咗個女」。佢解釋，女兒都係飲食界選民，自言一旦參選，「請個女食飯都被人話賄選」，預言屆時同女兒食飯都要分開埋單。不過，佢拒絕透露女兒「撈邊行」，笑言開魚檔也是選民喎。已經榮升長者嘅張宇人又自言唔再係「廿蚊張」，因為佢已經合資格使用長者乘車優惠，係真正嘅「兩蚊張」。
