政壇：晨早揸老爺BENZ 曾蔭權鬼祟兜風
官司纏身嘅前特首曾蔭權爵士（曾爵士）自早前上庭之後，都鮮有現身，但佢尋日早上就又再鬼祟出巡，仲親自開出自己輛古董老爺BENZ招搖過市。早上七時許，記者喺畢拉山道見到有架古董老爺BENZ猛閃車頭大燈，疑似嫌前面嘅校巴駛得慢，認真無品。望真啲，原來開呢輛古董老爺車正係曾爵士，晨早流流，唔知去邊呢？莫非趁還有時間，晨早去吸啖新鮮空氣？
曾蔭權（小圖）疑似嫌前面校巴駛得慢，猛閃車頭大燈。
未知曾爵士係咪因為見到現場有記者，佢嘅表情似乎有啲緊張，當前面輛校巴開走後，佢就即刻「開快兩步」扭軚轉入畢拉山道高級公務員宿舍，即係佢嘅寓所所在地。不過，奇就奇在曾爵士並無將輛老爺車停泊喺原來嘅車位，而係駛咗入宿舍，泊咗其他車位，而曾爵士之後亦無再現身，真係貫徹佢鬼鬼祟祟嘅作風。
其實曾爵士呢部老爺車都已經有好一段歷史喇，由於老爺車耐唔耐都要開動「郁吓」，所以以前佢喺出任政務司司長同特首時，都會定時由官邸開出老爺車兜圈，其實車輛同人一樣，都是「年紀大，機器壞」。
