新一屆立法會選舉於今年九月舉行，呢四年經歷佔領行動、旺角暴亂等抗爭事件後，唔少人變成「黃絲」或「藍絲」，更有人質疑泛民主派仲係咪支持法治。本身係大律師嘅立法會法律界議員郭榮鏗有公文袋背景，公文袋又屢幫示威者做義務律師，自然招來批評。香港律師會尋日舉行傳媒午宴，被問及郭榮鏗表現，會長熊運信就大耍太極，仲話佢個人意見都係想搵番個事務律師代表佢哋好啲。

雖然熊運信覺得郭榮鏗相對前任法律界議員吳靄儀冇咁激，又會定期同佢哋開會，但佢個人意見都係想搵個事務律師代表佢哋，仲話依家表態係咪支持郭仲係太早。其實以往兩屆選舉，都有律師會前會長出選，今屆會唔會都有律師會中人出選呢？熊運信就澄清，佢哋係以個人身份出選，唔係律師會推薦嘅。不過，過去兩屆律師會候選人都攻陷唔到法律界呢個堡壘，唔知今次仲會唔會繼續有事務律師出戰喇！

難忘柬國律師問「畀錢法官」

另外，旺角暴亂後，有支援被捕者嘅律師被點名係「暴動律師」。熊運信就話律師就係要代表客人，唔應該咁標籤，但就笑言冇示威者搵佢做代表。

佢又提到之前隨律政司司長袁國強到柬埔寨同當地律師會交流，並以貪污同人權保障為題，有成三百名當地律師出席。但佢最記得係喺講完之後，當時現場第一條問題係問佢每個月要畀幾多錢法官，佢當時就答「從來都冇」。當地嘅律師即時好驚訝問佢：「咁你咪輸晒啲官司？」佢憶述當時除咗苦笑，都唔知講啲乜嘢好嘞！

第一手消息請下載on.cc東網iPhone/iPad/Android/Windows Phone Apps