形容一個人有眼無珠唔識貨,可以話佢「上好沉香當爛柴」。至於沉香有幾咁矜貴,行開山嘅朋友一定好清楚,事關好多土沉香樹慘遭內地斬樹黨毒手,家陣已經買少見少嘞。

講多無謂,數字最實際。海關由二○一一年至二○一四年破獲二十一宗非法砍伐土沉香,而警方單係舊年已經破獲一百二十宗。啱啱上個月之嘛,水警喺南丫島搗破一個斬樹黨,拘捕五名雙程漢,檢獲一百五十公斤土沉香,足足係過去兩年喺南丫島檢獲總數嘅三倍,都咪話唔得人驚。

點解斬樹黨咁猖獗?無他嘅,土沉香有藥用同工藝等價值,近年喺內地更加係有價有市,一克市價講緊八百蚊人仔,分分鐘拍得住黃金同鑽石,淨係聲稱出售本港野生土沉香嘅內地網店就有近四十間,加上近年內地放寬來港個人遊,唔少人就係扮行山露營友來港作案,呢啲斬樹黨愈來愈專業,踩線、運輸、銷售等各司其職,真係唔到你唔服。

好嘞,家陣土沉香非法砍伐問題愈來愈嚴重,照計當局應該亡羊補牢,可惜事實啱啱相反。立法會環境事務委員會尋日開會,有議員要求港府立例規管及禁售土沉香,同時加強巡查以及嚴懲斬樹黨,點知漁護署左推右推,話土沉香主要運去內地販賣,本港銷售情況唔嚴重,至於非法砍伐問題,已經加重刑罰,曾有個案被重判入獄五十五個月;又話已經加強巡查,並與內地部門加強溝通喎。咁就好笑嘞,既然班官老爺做咗咁多嘢,情況又點會不斷惡化呢?

正所謂,只要精神不滑坡,辦法總比困難多。山頭咁大,人手有限,的確好難度度巡晒嘅,譬如有人建議借助高科技,喺郊區裝置紅外線攝錄機,確係有得諗。可惜你有你講,官僚睬你都有味。最好笑係,官老爺耐唔時都會喺郊野公園戙個牌出嚟,警告人唔好砍伐樹木,以為咁樣就叫做咗嘢,其實係聰明笨伯,賊人非但冇有怕,分分鐘仲「醒起」呢度有寶添。

點都好喇,今時今日中港矛盾日益尖銳,香港已經夠晒家嘈屋閉,本土派日見囂張,當局繼續縱容姑息內地斬樹黨,盞授人以柄嘅咋。話時話,「香港」呢個名就係運送香料嘅港口而得嚟,土沉香更有「祖先樹」之稱,家陣祖先樹有難,仲喺度唔嗲唔吊,關人個關,有朝一日沉香樹絕種,香港就唔係香港嘅嘞,叮!