近年激進本土聲音抬頭,蔓延至八間大專院校,部分大學學生會趁校委會或校董會舉行前發起圍堵等抗爭行動,爭取修改相關大學條例等訴求,相對而言,科技大學猶如世外桃源,迄今未見有激進嘅校園行動抗爭出現,科大校董會主席廖長城表明唔怕主持校董會會議時,遇上本土派發起衝擊行動,科大校長陳繁昌更話科大學生冇乜搞政治,校風都係崇尚學習,似乎二人均對科大學生信心十足。

廖長城唔擔心主持校董會會議時,遇上本土派發起衝擊行動。

陳繁昌(左)認為科大學生崇尚學習,身旁翁以登亦認同呢個睇法。

科技大學尋日舉行鄭裕彤樓開幕典禮,新世界發展創辦人鄭裕彤嘅兩名兒子鄭家純同鄭家成,以及科大一眾領導層,包括校長陳繁昌、副校長翁以登、校董會主席廖長城都有出席支持。

對於多間大學接連發生抗爭行動,廖長城似乎好淡定,表明唔怕開校董會時會有本土派衝擊,其後又話科大一向都好平靜,山明水秀,科大學生崇尚學習同研究嘅風氣,加上科大國際排名又升咗,希望年輕人搵到機會發揮所長。

校長陳繁昌冀學生攞諾獎

翁以登認為科大學生嘅傳統係好勤奮同有自己嘅目標,科大亦畀好多機會佢哋,無論學生想盡社會責任、交流、讀研究生等,學校都有好多計劃同各類型嘅支持,相信因而對社會亦冇咁多怨憤喎。陳繁昌就提及科大已有二十五年歷史,希望到三十周年、三十五周年時,可以有土生土長嘅學生有國際學術成就,例如攞到諾貝爾獎或研發出全世界搶購嘅高科技產品。

講番尋日開幕嘅科大鄭裕彤樓,樓高八層,面積一萬平方米,由鄭裕彤慈善基金捐助,新世界發展主席鄭家純致詞時話父親鄭裕彤一直重視教育同培訓人才,又指鄭裕彤樓擁有國際水平嘅設備,寄語學生應好好珍惜學習機會,日後有能力就回饋社會。

第一手消息請下載on.cc東網iPhone/iPad/Android/Windows Phone Apps