政壇：王庭聰掃單位 合家同廈
話說南旋集團主席王庭聰早年送豪宅畀女兒做嫁妝，喺政商界成為一時佳話，本身有三名子女嘅王庭聰原來一早密密入市購入多個磚頭，為咗王氏一家人喺今年稍後時間，入住同一棟大廈嘅唔同樓層單位，方便可以互相照應。
王庭聰同三名子女喺今年稍後時間，將入住同一棟大廈唔同樓層單位。
王庭聰尋日同傳媒聚會時話舊年已買咗同一棟樓幾個單位，預備今年中秋後同三名子女一齊搬屋，屆時自己會住十五樓，兒子會住十二樓，兩名女兒則住喺八樓各一個單位。
其後佢憶述以前湊大三名子女嘅點滴，透露以前親自教子女去廁所，會放個痰罐喺大人廁所旁邊，教小朋友踎喺痰罐，自己就踎喺個廁所陪住，咁樣身教幾次，小朋友就會學識。佢又教路，若然想小朋友恒齒整齊，最好一隻乳齒門牙鬆咗，就搖鬆埋旁邊隻門牙，只要兩隻一齊甩，第日成排牙就會好整齊。
