新民黨主席葉劉淑儀揀正尋日、農曆正月十五元宵佳節同傳媒茶敍慶祝，仲自爆同已故丈夫嘅一段姻緣係佢人生嘅唯一情史。葉劉憶述，當年加入政府當政務官後開始「朝八晚八」生活，冇時間拍拖，直至二十八、九歲時，其母開始焦急，「係咁周圍推銷我」，更開始到茶樓食點心「相睇」搵老公。

葉劉（左）自言天生欠缺桃花運，旁為兩名黨副主席田北辰（中）同潘國山。

葉劉笑言，當年同丈夫嘅擇偶條件一拍即合，只要求對象係大學畢業，但二人首次約會後，一個禮拜後再到流浮山展開初戀飯局，拍拖半年即結婚。佢又自言天生欠缺桃花運，事關佢喺女校畢業後入讀港大，因成績名列前茅被稱為「狀元女」，又唔願意參加「抽水派對」同男生「摸身摸勢」，加上曾經同佢約會嘅男仔都覺得佢性格太認真，故大半生都同男性絕緣。

此外，葉劉談及九月立法會選舉初步部署，透露自己同黨副主席田北辰計劃角逐連任，會喺名單中排名第一，又表明冇興趣做下屆立法會主席，因主席工作猶如班主任一樣；當問及有冇興趣做特首，佢則稱「唔講得」。

第一手消息請下載on.cc東網iPhone/iPad/Android/Windows Phone Apps