政壇：搞搞政：油尖旺區會 拜神求鎮暴
東方報業集團按照傳統，早前於立春日分別為香港運程、政治及治安到黃大仙祠求籤，結果求得三支「下下籤」，其中治安方面求得「東施效顰」，言猶在耳，一踏入猴年就發生持續九小時嘅旺角暴亂，大批示威者掟磚頭、縱火等暴力行為一次過出現，顯然應驗求得嘅三支「下下籤」；但另一個不為人知嘅因素，可能同油尖旺區議會有關。
旺角暴亂發生至今剛滿半個月，警方拘捕逾七十名涉事者，包括前日拘捕下落不明多時嘅本土民主前線發言人黃台仰。外界亦唔希望類似旺角暴亂事件再次發生，據聞油尖旺區議會都有跟進行動，就係打算齊齊到區內各寺廟參拜。
喺年初接任油尖旺區議會主席嘅葉傲冬，日前出席一個新春活動時透露，過去每年都會去拜地主誠心祈福，但佢上任後太忙冇拜，之後就發生旺角暴亂事件，所以依家非常後悔，稍後會由道教聯合會副會長、油尖旺前委任議員侯永昌帶領，聯同區議會兄弟盡快帶齊燒肉、雞、酒等拜番區內各寺廟，祈求「區」泰民安。
須下情上達疏民怨
事實上，涉及宗教嘅事宜，如拜神或拜地主向來係「信則有，不信則無」，今次葉自爆要盡快率眾去誠心祈福「補鑊」，相信都係從呢個思路出發，盼得安心。不過，「補鑊」嘅嘢可一不可再，欲標本兼治須防患未然，一方面警方須嚴正執法，盡快拘捕涉事者，至於區議會層面亦須做到下情上達，梳理市民嘅訴求或不滿，避免成為隱而未爆嘅炸彈！
