政壇：「良」言游說抗拉布
香港教育學院升格正名為「香港教育大學」之路，最後一關係要獲立法會通過《2016年香港教育學院（修訂）條例草案》。校長張仁良尋日喺傳媒春茗話，已與唔同黨派包括喺立會拉布嘅人民力量議員溝通，相信立會可以喺今年七月、即立會換屆前通過正名，讓本屆畢業生喺授憑時取得大學證書，攞到「遲來嘅禮物」。
教院正就正名大學後的新校徽設計收集意見。
張仁良形容今年係教院躍進嘅一年，而正名亦肯定咗教院已達到其他公立大學嘅水平，對師生係一大鼓舞。被問及會否向政府提出調動議程，佢話依家時間尚早，會等立會三月初首讀議案後，再研究係咪向政府提出。佢又會繼續約見同游說議員，盼議程盡快獲審議。
指莫為「一個人」修大學例
咁佢擔唔擔心議員依家喺具爭議嘅議案拉布，會令教院正名嘅議案受阻？佢話以往都發生過議員拉布，但相關議案獲處理後，其他議案就可快速處理，跟住佢指向觀音像，話「有神保佑」。老實講，依家版權修訂條例草案唔知拉到何年何月，跟住班激進派議員又會就來年度嘅財政預算案拉餐飽，之後仲有好多草案排住隊上立會，睇嚟張仁良都咪太樂觀嘞！
另外，教院委託設計顧問公司初步設計新校徽，師生同校友可就六個候選校徽畀意見。同時，校方亦開放師生同校友提交校徽設計，喺四月完成網上意見調查後，交校董會拍板。而喺校訓諮詢方面，最受歡迎嘅候選校訓「學行兼脩」同「厚德日新」，工作小組開會後將再向校董會推薦。另教院正籌建特教綜合服務中心暨宿舍大樓，料須斥資十億元，冀獲社會各界捐款。
對近日八大院校嘅教職員發起公投要求修訂大學條例，張仁良話尊重教職員嘅言論自由，但指公立大學嘅管治唔係三言兩語可解決，亦涉及大量公帑，唔希望為「一個人」而改變整個制度，但佢冇正面回應「一個人」係咪指現任校監特首梁振英。
