「童子軍跳彈床」呢句經典電影對白點解，相信唔使太一叮解釋。不過講笑還講笑，跳彈床呢家嘢其實有一定風險，一個唔小心整親，後果可大可小，點可以是是但但o架！

話說自從「彈床女神」何雯娜喺京奧摘金後，呢項運動喺兩岸三地大行其道，香港嘅彈床場地更加如雨後春筍，開到成行成市，可惜亦有唔少樂極生悲嘅個案。聯合醫院舊年淨係下半年就接收咗十七宗市民跳彈床受傷嘅個案，其中九名係兒童，最細嘅得六歲，部分傷者足踝關節更出現骨折及脫位，隨時造成永久機能損傷。話口未完，尋日又有一名少女跳彈床跳到上病床嘞。呢批傷者全部都係幫襯九龍灣一間新開業嘅彈床樂園，而港島東區近期亦接到八宗同類個案，都咪話唔誇張。

記者去九龍灣個場睇過，發現職員嚴重不足，有時一個人要睇九個客，做到踢晒腳。咁都未算，聽講周時有年輕人喺無專人指導下做出高難度動作，咁搞法唔出事至奇喇。

咁場地負責人又點回應呢？佢一方面承認場地未有持牌教練駐場，另一方面打定預防針，強調一旦有顧客傷亡，如果唔係店方疏忽，概不負責，如果證實係店方疏忽，就會有第三者保險賠償咁話。

吓，咁都得！冇專業人士睇住個場，安全毫無保證，同搵消費者條命較飛有咩分別吖？再講，今時今日都未爆大鑊其實只係好彩，到真係搞出人命，賠幾多錢都補唔番喇！大家應該記得，曾經公開要求安樂死嗰位四肢癱瘓病人斌仔，就係因為體操項目出意外搞成咁嘅。唔係靠嚇，美國每年有近十萬人因彈床意外入急症室，當中每二百人就有一個重傷，問你怕未！

當然喇，好似跳彈床呢類高風險運動，市民有責任注意自身安全，特別係清楚免責條款，但都唔代表當局可以翹埋雙手，冇監冇管o架嘛。不過嘥氣喇，港產官僚出名後知後覺，對於新興潮流玩意，佢哋識鬼咩，好似依家hit爆嘅工廈室內賽車咁吖，唔少場地安全設施嚴重不足，落場鍊車既唔使戴頭盔，亦唔使綁安全帶，鬼咩，原來呢啲場地大部分未經機電工程署審批，亦冇領取公眾娛樂場所等相關牌照，根本就係無王管！

一句講晒，官老爺做嘢不嬲是是但但，求求其其，萬一唔好彩搞出個大頭佛，搵你哋班官僚算帳呀，叮！