城中鏡：繁簡兼書

日前喺一個新春團拜活動上遇到公開大學校長黃玉山，佢笑言自己係實用主義者，平時無論繁體、簡體都會照用，尤其遇上「龜」、「籲」、「鑿」等筆畫較多嘅單字，就一定會寫簡體字，寫寫吓都開始唔記得呢啲字嘅繁體點寫喎。

但係黃玉山話簡體字都有缺點，因為好多中文字本身係嚟自甲骨文、象形文字等，而簡化咗字體嘅筆畫就會失去原意，實在相當可惜。如果係咁，點解佢又懶寫筆畫較多嘅繁體字呢？至於學簡體字所引起嘅爭議，佢就呼籲大家唔好凡事太過政治化。

郭偉強：同時學習無衝突

將為人父母嘅又點睇呢？下月榮升做爸爸嘅立法會議員郭偉強，最近已開始籌謀小朋友嘅讀書大計，佢話小朋友一定要識繁體字，因為繁體字蘊含豐富文化，例如字體結構等，但佢都認同要識簡體字，又指繁、簡體字之間就好似學英文同普通話咁，同時學習係無衝突嘅。

郭偉強又話讀書時無特別學簡體字，但中學時做功課一定要全繁體或全簡體，佢為咗做功課可以快啲，所以會主動睇書學吓簡體字，間接學埋簡體字無蝕底。

仁濟醫院前主席、善德基金會主席董吳玲玲亦有親身經歷，事緣農曆新年期間，幾歲大嘅孫女用紅紙捲炮仗，仲要喺上面寫「恭喜發財」，但就唔識寫個發字，要佢幫手。

點知佢一時間記唔起繁體「發」字點寫，於是就寫咗個簡體字，孫女見到就大讚簡體嘅「發」字易寫好多，董太認為呢個方法可以減低小朋友對學簡體字嘅抗拒，建議大家參考吓。