政壇：搞搞政：工聯會遊行甩轆 吳秋北「反對和平」
工聯會尋日就旺角發生暴亂舉行「全民反暴力、守護香港」遊行，工聯會聲稱發動約一千三百人遊行，但警方指高峰期只有九百人參加，工聯會帶同國旗同多個紙牌口號，有磚、火、恐龍甚至憤怒鳥圖案表明反暴力，仲準備禁暴力貼紙畀參加者貼喺紙板表達意見，由灣仔遊行到警察總部遞交請願信。本來個勢都起得唔錯，點知理事長吳秋北上台發言時，高呼「今日出嚟係要守護香港、反對和平」，佢無為意自己講錯，搞到台下議論紛紛，工聯會中人「唔知好嬲定好笑」，非工聯會嘅人就自然陰陰嘴笑。
黃國健講錯嘢倒米
正所謂「一不離二」，之後吳秋北又再講多一次「反對和平」，佢先開始顯得有少少猶豫，但都冇澄清，莫非佢真的「反對和平」？及後主持之一、立法會議員鄧家彪就幫手補鑊，指工聯會一定係「反對暴力」，為吳秋北「甩轆」打圓場。
其實工聯會嘅立會議員黃國健上周五回應施政報告致謝議案時，提到點解工聯會部分議員要投支持票時，就講錯「我哋幾時都係企喺打工仔嘅對面」，隨即被網民寸爆工聯會講出真心話，認真倒米。
議員黃毓民早幾日喺保安事務委員會上批評工聯會當年主導六七暴動，係最無資格指控他人使用暴力。而尋日由工聯會主辦遊行，自然被人質疑。
