政壇：公民力量執位 潘國山坐多陣
喺前年同新民黨結盟嘅公民力量，喺舊年區議會選舉遭受成立以來最大重挫，二十三人參選僅取得十一席，公民力量執委會主席潘國山更表明會辭職以示問責。不過，隨着三名擔任執委嘅區議員落敗，當中更有兩名副主席出缺，執委會連組班都成問題，潘國山喺公民力量班兄弟極力挽留下，決定「反口」唔退下火線，多坐一會，留任主席至一八年任期完結。
潘國山
公民力量前晚舉行會員大會，因應兩名副主席羅光強、鄧永昌同執委陳國添未能連任區議員，變相未能出任執委一職，需要喺換屆前先行「大執位」，七人執委會縮減規模剩下四人，要由候補委員譚領律頂上，湊夠五人單數。而原定辭職謝罪嘅潘國山，就獲沙田區議會主席、公民力量會長何厚祥極力游說，仲聯同公民力量班兄弟去信潘國山，表示主席之位現時並無出缺，加上九月立法會選舉將至，需要有經驗嘅人領軍，希望潘國山可以鎮守江山多一陣，潘國山最後亦應承，而副主席人選會喺日內互選誕生。
有公民力量中人認為，現時佢哋餘下嘅四名執委年齡都係四十歲以下，正好響應新民黨以至整個政治氣候要求年輕化嘅聲音。至於佢哋係咪支持其義務法律顧問容海恩出戰立法會新界東選舉，據知佢哋嘅共識係傾向支持，但仍然要程序上通過。
