政壇：推「三次創作」MV 鼠王芬rapper上身
有「鼠王芬」外號嘅立法會議員梁美芬向來係網上其中一個頭號惡搞對象，有網絡媒體早前將詩歌《主能夠》二次創作為《鼠能夠》戲謔梁美芬。表明銳意革新形象嘅梁美芬，近日「三次創作」推出《真能夠》MV兼向網民賀年。不過，原定農曆新年推出嘅MV，卻因為旺角暴亂，社會氣氛沉重而遲遲未上架，網民要一睹「梁靚芬」rapper（饒舌歌手）上身，可能要等到下年，因為今日已經係元宵節。
單係睇MV嘅撮圖，已睇到梁美芬演出夠晒奔放。
梁美芬尋日出席傳媒茶敍時展示佢嘅MV作品，不但搵朋友幫忙出鏡，以「真．梁靚芬社區合唱團」上陣，向選民表明佢為社區服務的決心，其中一段中文饒舌（rap）歌詞更係佢親自填詞。佢笑言，填詞易過鏡頭前演出，填詞只需四十五分鐘，但喺鏡頭面前表演戴帽就「NG」咗十幾次。不過，要重溫梁美芬嘅饒舌風采，其實佢早喺一二年已經為西九新動力競選團隊填詞，創作《快樂西九》，成為當年網絡一時熱話。
