政壇：戴耀廷促協調 傘兵大潑冷水
佔領行動發起人之一、港大法律系副教授戴耀廷早前拋出「雷動計劃」，聲稱用來為「非建制派」嘅候選人做協調，希望喺九月立法會選舉取得過半數議席。不過，泛民主派政黨就對計劃大潑冷水，覺得成功協調嘅機會唔大，就連一班喺佔領行動後衍生嘅傘後組織，都話對計劃只抱觀望態度。當中青年新政亦都認為計劃係咪可行唔係佢哋話事，要睇其他人，甚至話其他人有拒絕嘅意思。
部分傘後組織同公民組織對立會選舉協調抱觀望態度。
泛民主派政黨同傘後組織對戴耀廷拋出「雷動計劃」大潑冷水。 （資料圖片）
傘後組織「八十後浪」同八個公民組織尋日搞咗個發布會，講吓各組織嘅未來動向。東九龍社區關注組發言人陳澤滔同青年新政發言人黃俊傑都分別提及，會喺九月立法會選舉積極尋求參與空間同積極考慮派人參選，但慈雲山建設力量新任領導層鄧穎輝就話唔會派人參選。鄧穎輝仲透露戴耀廷有搵過佢，話想食餐飯傾吓協調；但陳澤滔就話戴耀廷就冇搵佢哋。咁就奇怪喇，戴耀廷唔搵會參選嘅組織，反而會搵唔派人參選嘅組織，等於搵錯對象去傾，咁到底佢想點協調呢？
