嚟緊九月嘅立法會選舉如箭在弦,其中九龍西選區由於人口增長,議席數目由五變六,新增嘅一席自然成為兵家必爭之地。本身喺九西冇議席嘅民協,早已打開口牌表明主席莫嘉嫻同副主席譚國僑有意競逐,工黨副主席趙仕信早前亦話有興趣。據知,社民連新任主席吳文遠都有意落戶九西,三個泛民主派親基層政黨同樣希望爭奪九西一席,加上青年新政游蕙禎,睇嚟一場混戰在所難免。

社民連尋日公布新一屆執委會名單,立會議員兼主席「長毛」梁國雄將退居幕後,由吳文遠接任主席,長毛、吳文遠、黃浩銘同陳德章,同時獲推薦代表社民連出戰立會選舉。雖然該黨話出選嘅區域會視乎未來政治局勢同黨內資源再作調整,但據知四人會組成三張名單出選,其中副主席黃浩銘同陳德章會合組名單出戰新界西、吳文遠有意落戶九西,而長毛則留守新界東競逐連任,但係長毛話自己都唔係好想選。

雖然九西本來已有多個泛民政黨表明有意參選,但吳文遠加入九西戰團係可以理解嘅。事關佢上屆出選嘅港島區減少一席,佢再出戰亦必死無疑,九西有多一席,對佢嚟講仍有一線生機,話唔定可「博一博,單車變摩托」,改變社民連長久以嚟一人政黨嘅形象,可惜地區樁腳不足,或會成為佢最大嘅障礙。

促團結減碎片化

對於選舉部署,吳文遠表明最終有幾多人參選仍要視乎資源,但局勢變化好大,佢希望反對派可以團結一致,減少碎片化現象。佢又認為新世代已冒起,希望與唔同嘅反對派團體包括學生、傘後組織等加強合作。不過,泛民之間嘅合作好多時都係只聞樓梯響,究竟係成功協調,抑或係分薄票源益建制派,就要拭目以待嘞!

第一手消息請下載on.cc東網iPhone/iPad/Android/Windows Phone Apps