胎毛筆傳人失巨款案 重案組落馬洲拘疑犯
【本報訊】師承丈夫製作胎毛筆的女師傅徐雲芳，上月家中發生爆竊案，痛失二百零三萬元積蓄，旺角警區重案組接手調查後，鎖定一名目標男子，至前日下午二時許，在落馬洲管制站以涉嫌爆竊將姓陳目標男子（三十四歲）拘捕，重案組探員正追查贓款去向。
警方拘捕一名涉嫌與案有關男子。
徐師傅對案件有新進展感到十分高興。（資料圖片）
徐師傅獲悉警方拘捕一名疑犯後坦言︰「好開心！有番小小希望！」徐續指，家中遇竊後，「實有唔開心，筆錢都係一生積蓄，係平時犧牲禮拜六、日啲時間做嘢，儲咗咁耐先有筆錢。」她續稱：「好多親戚朋友都有開解我，但唔想佢哋咁擔心，所以都處之泰然去面對...仲有啲客人睇到新聞打電話嚟關心我，叫我睇開啲，覺得人間有情。」
事發於上月五日，徐放工返回旺角寓所時，赫見單位鐵閘及大門打開，木門被撬毀，內有搜掠痕迹，懷疑遭爆竊，於是報警求助。經點算後，證實放在睡房的二百零三萬元現金，以及一批約十萬元金飾不翼而飛。徐解釋，「自己身體唔好，如果有咩事家人會攞錢困難」，所以一直把畢生積蓄放在家中。
