城中鏡：丘文俊拉票靠「出貓」

區議員最重要嘅工作係乜？其中一項當然係同街坊打好關係喇，沙田區議員丘文俊就有妙計。早前丘文俊喺社交網站上載咗佢同一隻叫「叮叮」嘅貓錫錫嘅相，原來佢喺辦事處養咗兩隻貓，呢隻「叮叮」係佢喺街執番嚟，當時只係出世兩日，所以佢要做埋奶爸餵奶添！丘文俊笑稱，叮叮性格十足港女，事關街坊讚佢愈大愈靚，叮叮都好高竇唔睬人喎。不過，街坊始終對兩隻貓好好，仲成日攞貓糧畀佢哋食。難怪丘文俊直言兩隻貓幫佢拉到票喇！