城中鏡：阿Ann教搵老伴
喺尋日情人節，好多人都同至愛嘅人溫馨度過。但曾經自爆老公梁海明經常忘記結婚紀念日嘅立法會議員阿Ann蔣麗芸，尋日同老公一齊喺屋企舉行傳媒新春團拜時，梁海明又忘記尋日係情人節，冇準備禮物，惟有錫番啖補鑊，認真冇記性。
蔣麗芸（左）同梁海明打情罵俏過情人節。
杜振源喺新年期間，同家人去咗墨爾本度假。
郭詩慧（右）同陳振邦啱啱去完日本旅行返港。
眾人起哄叫梁海明錫多啖，但係阿Ann唔制，仲話要一個人去添馬公園睇「花海」，唔預老公喎，今次真係大鑊喇！其實佢哋只係耍吓花槍啫，轉頭阿Ann就幫老公兜番，話自己都唔記得尋日係情人節喎。
阿Ann又教路大家點搵伴侶，佢話最好係搵大自己十幾二十年，咁先可以教自己點行條路，而且有經濟基礎。講講吓，佢仲以立法會議員謝偉俊為例，打趣叫現場男士可以考慮吓麥美娟、劉慧卿同陳婉嫻添！
杜振源偕家人墨爾本過年
另一邊廂，喺沙田馬場見到「快勞夾大王」國際文具集團主席兼行政總裁Simon杜振源，佢笑言自從阿仔出世之後，就一直甚少有機會同太太過二人世界嘅情人節，通常都係一家人一齊慶祝。後來阿仔結咗婚，呢兩年仲多咗個孫一齊過添，好熱鬧。新年期間，香港天寒地凍，Simon就同家人去墨爾本玩，過咗個暖笠笠嘅假期。
莎莎國際主席郭少明嘅女兒Melody郭詩慧同老公陳振邦都有入場。Melody話佢哋同小朋友啱啱去完日本旅行，小朋友滑雪好開心。至於情人節，就會同小朋友一齊食晚飯慶祝。
