本港多次發生樹木倒塌意外,社會關注樹木管理,亦有聲音要求政府訂立樹木法,但當局就話本港喺呢方面有經驗嘅人才唔多,唔可以貿然立法,都係嗰句「拖字訣」。但係呢啲意外一次都嫌多,當局唔能夠再掉以輕心,發展局話樹木管理部門已展開工作,趕緊喺今年風雨季前全面評估樹木風險,同埋跟進所需的緩減措施,減低樹木倒塌危機,保障市民安全喎。

陳茂波話盡量減低樹木倒塌風險。(資料圖片)

發展局局長「波波」陳茂波發表網誌指出,政府二○一○年推行《樹木風險評估及管理安排指引》,根據國際良好作業標準,考慮香港情況而制訂。現時約八十萬棵樹木位於優先樹木風險管理地點,當局每年評估、持續監察和護理該些樹木,《指引》為樹木管理部門提供參考。

移除前分析公眾敏感度

波波又話樹木辦多年來持續改善《指引》內容,喺舊年嘅修訂中,包括喺樹木風險評估同管理安排上加入分流制度,精簡風險評估工作流程,讓當局優先護理珍貴樹木同處理健康或結構有問題嘅樹木。新修訂嘅指引規定,喺非緊急情況下,樹木管理部門喺移除受公眾關注嘅樹木前,須分析敏感度,同埋盡量喺合理可行的情況下,回應公眾對樹木或被移除嘅關注,增加決策過程嘅透明度。

老實講,若當局仲係後知後覺、唔踢唔郁嘅話,咁即係搵市民嘅生命安全較飛啫!波波呢次算係吸取教訓,學精咗嘞!

第一手消息請下載on.cc東網iPhone/iPad/Android/Windows Phone Apps