成立咗接近十年嘅社民連，自一一年立法會議員黃毓民、陳偉業等人大規模退黨後，社民連就逐漸變成「長毛」梁國雄一人黨。社民連嚟緊星期日，就會舉行周年會員大會同換屆選舉，我哋收到風，擔任主席四年嘅長毛唔再競逐主席一職。長毛接受查詢時，承認會退下火線，但大家更加關注佢九月會唔會尋求連任立會議員，佢就話要傾吓先，講法頗曖昧。究竟長毛會唔會裸退？似乎仲要觀望吓喇！

社民連創黨時，係香港政壇最旗幟鮮明嘅左翼，○八年仲係黨員嘅毓民就向前特首曾蔭權爵士掟出第一隻蕉，成為喺議會廳掟嘢嘅始祖。社民連之後一直都以公民抗命為主，創下多個「首次」，包括一○年發起「五區公投」、一一年反對預算案遊行後留守街頭被捕，亦因此提高咗市民抗爭意識。但近年更激進嘅政團冒起，長毛舊年喺旺角就畀反對「網絡23條」嘅激進人士包圍辱罵，真係時不我與。

吳文遠接棒呼聲高

長毛話當年係因區選失利先做主席，已做咗四年，冇理由成日霸住個位，決定退下火線，但會留任行政委員。咁交棒畀邊個呢？據悉現任外務副主席吳文遠呼聲最高，外副就由內務副主席黃浩銘頂上，秘書長陳德章則升任內副。

潮流興世代交替，咁佢會唔會連立會個位都退埋？佢就話「要傾吓先」，因為唔係一個人嘅事，如果有黨員想選，佢唔會阻攔。我哋問過吳文遠係咪會接任主席，佢就話「唔答呢啲嘢」。

據知情人士分析，長毛退位嘅原因，仲包括佢一直都唔想理黨務，而且退下火線後，新人先有機會上位。據悉，長毛暫時仲好大機會喺新界東出選尋求連任，而黃浩銘就同傘兵及學運中人協調緊，有機會出選新界西。社民連最終係多取一席，定係全軍覆沒，大家放長雙眼睇喇！

第一手消息請下載on.cc東網iPhone/iPad/Android/Windows Phone Apps