政壇：人日無面畀 勞資鬧鑊「金」
尋日係年初七「人日」，再加埋西方情人節，應該開開心心至係，但係喺勞資雙方金睛火眼(目及)實嘅問題，就算係人日都無面畀，雙方繼續隔空駁火，其中工業界議員梁君彥喺港台英文電台節目中，開宗明義指取消強積金對沖機制係倒退，會令到好多中小企執笠；另一邊廂，工聯會議員郭偉強同王國興就隔空反擊，繼續要求盡快實現取消強積金對沖機制，真係唔講仲以為尋日係年初三赤口。
身為商界一分子嘅梁君彥，喺電台節目中提及退休保障同強積金對沖機制，首先佢以澳洲同英國都分別將領取退休金嘅年齡上調為例，指港府應該要完善現有嘅多重退休保障，同時亦都認為目前「不論貧富」方案唔公平。
梁：中小企難信政府
對於勞工界要求可以取消強積金對沖機制，梁君彥表明若然取消會造成更多問題。事關依家香港嘅中小型企業有超過一百萬名員工，亦都係香港經濟最根本嘅支柱，再者呢個做法更會違反當初立法強積金計劃嘅原意，會令中小企業對政府失去信心。
梁君彥再三強調政府應該要支持中小企業，仲話如果要檢討強積金制度，應該要評估商業環境，唔應該操之過急，如果唔係會影響長遠經濟發展。
事有湊巧，工聯會尋日朝早舉行新年花車巡遊，主打盡快實現取消強積金對沖機制、標準工時要立法等議題，擺明隔空向工商界叫陣，除此以外，郭偉強仲要求政府檢討破欠條例，希望可以進一步保障一班打工仔。勞資雙方喺人日都要就勞資議題隔空開火，就知道雙方都各不相讓，當局如希望取得共識，似乎要再下一番苦功嘞！
