政壇：內地廠派花紅 李運強開先河
年尾出花紅，可以話係打工仔一年辛勤工作嘅最好消息，但原來內地一般無派花紅呢個習慣，理文造紙今年就破格引入咗花紅制度，令內地工人都一樣咁開心。
李運強（右）話，內地工人今年獲派花紅。
理文榮譽主席李運強話，內地工人過去幾年嘅人工加幅同速度都比較急，所以今年暫時唔加薪住，但佢哋就會首次派半個月人工嘅花紅，理文嘅工人知道有花紅分都好開心，今年可以過肥年。李運強又話，近年生產及製造業都有放緩迹象，佢哋都要跟隨呢個趨勢改變策略，除咗開始賣紙巾等消費品，仲喺江蘇同三亞經營酒店，實行進軍旅遊服務行業。
