立法會議員工作繁重,分分鐘會忙到唔記得重要日子而忽略家人。勞工界議員鄧家彪(Bill)就率先出事仲大呼「死火」,因為佢唔記得咗今日情人節,搞到要趁空檔急約太太補鑊!

鄧家彪忙到唔記得情人節,要急約太太食下午茶補鑊。

Bill本身今日已經將工作安排得密密麻麻,一醒起係情人節就話要諗吓點調動工作,但為求效率,就要趁尋日有空檔,把握時間即刻約太太食下午茶補鑊,喺無乜準備下提早慶祝。Bill話太太都知佢忙,應該無預會有任何慶祝活動,難怪佢太太近日悶悶不樂喎。但Bill就話太太易氹兼明白議員工作忙碌,故相信會理解佢大頭蝦嘅。

除太太之外,Bill仲有位「小情人」要照顧,就喺佢囡囡嘞!佢希望可以同囡囡合唱一曲當表演,點知擅長唱大戲嘅囡囡竟嫌棄佢唱得差,枉Bill仲專登揀首難度低嘅歌添。睇嚟Bill除咗要落足嘴頭氹囡囡,仲要苦練唱功先得喇!

第一手消息請下載on.cc東網iPhone/iPad/Android/Windows Phone Apps