教育局提出認識簡體字嘅議題,隨即引來唔少討論,不過,當中好多意見都擺明誤導,新民主同盟(新同盟)尋日就到政府總部請願,反對將簡體字納入中小學課程,結果搞到教育局立即出稿反駁,局長吳克儉(吳得掂)隨後亦喺社交網站專頁上呼籲「請勿造謠」,斥有人謠傳當局擬強制學生由小一開始學習簡體字,吳得掂今次反應咁快,或者係因為政黨抽水唔夠料兼冇根據,而范國威、任啟邦猴年第一擊就撞板兼被摑,真係衰開頭!

教育局課程發展議會去年發表「更新中國語文教育學習領域課程(小一至中六)」諮詢文件,建議中小學生要具備認讀簡體字能力,內地同新加坡都用緊簡體字,香港學生學多啲嘢其實冇壞,亦有助加強競爭力,點知件事被政治化,早前先有多個家長同關注組織喺社交網站號召「一人一信」,聲稱捍衞香港教育,新同盟成員尋日又走去政總抗議,佢哋認為有關措施喺政治決定,只會破壞本港文化,無助學生學習中文,批評教育局要求學生學習簡體字,喺推動赤化嘅政治舉動多過回應社會要求,要求當局收回。

澄清無提倡以簡代繁

吳得掂隨後就做鍵盤戰士闢謠,希望市民不要無中生有,製造社會混亂。佢仲轉貼教育局嘅「繁簡字問題正面睇」一文,澄清坊間對簡化字嘅誤解同不確報道,重申當局從無倡議以簡體字取代繁體字,亦唔認同喺小學階段學習簡體字,以避免學生喺識字同寫字上有干擾,混淆繁簡字形,希望社會人士唔好誤解,同再作無謂猜測喇。

第一手消息請下載on.cc東網iPhone/iPad/Android/Windows Phone Apps