政壇：林卓廷搖身變股市明燈
曾任廉政公署調查主任的北區區議員林卓廷（阿廷），喺上年區議會選舉勝出，今年仲想乘勝追擊入主立法會添！尋日阿廷就趁新正頭喺沙田寓所同傳媒拜年，除咗親自落廚外，仲分享投資心得，唔講唔知原來佢買樓好有眼光睇得準，但買股票就做晒「明燈」，希望佢嘅心得唔係山埃啦！
保留供股證提醒自己
阿廷話一向都認為要趁低價買樓，所以○三年沙士時就喺屯門買入一個單位自住，但因為○八年轉去做廉署調查主任有平租宿舍住，於是決定賣出原有單位，賺咗成六十萬元，都算幾和味！點知佢貪勝唔知輸，諗住將賺咗筆錢拎去買滙控，諗住藍籌股夠晒穩陣，以為可以實食無黐牙，點知就出事。
阿廷見返工時間唔可以睇實個股市，所以就一早同銀行落定指示，要求滙控由五十幾元落到四十幾元就入貨，仲諗住應該實冇死添。點知當年金融海嘯，滙控股價一日就跌咗十幾元，佢更不幸地成為當日第一個接貨嘅羊牯，手上股票一日蝕咗三成。阿廷仲好記得當日喺廉署食晏時睇新聞，睇到呆晒嘅情景，講起仲欲哭無淚，難怪佢仲保留住滙控三十三元嘅供股證明，提醒自己呢個血淚史喇！
不過，阿廷話好彩自己係「Buy and Hold（買後持有）」，溝貨下最後可以平手離場，自己亦再次趁金融海嘯嘅樓價低位買入現時嘅住宅。而佢亦都好自豪手上持有用雙位數字股價、合共買入幾千股嘅港交所，雖然帳面有賺，但佢喺股價三百元時冇放到，依家就跌到一百六十三元，唔知佢能否笑到最後呢？
