城中鏡：蔡一鳳開足turbo生猴B
亞視前高層盛品儒同太太蔡一鳳前年註冊，舊年補擺喜酒，做咗兩年盛太嘅蔡一鳳揚言今年會開足turbo造人，趕生猴B，佢話：「今年新年大計就係生仔，老爺已經向我老公落咗order，出埋warning，最後通牒今年必須要傳宗接代。」
蔡一鳳話老爺出咗最後通牒，今年必須要傳宗接代。
蔡一鳳話早前因身兼塞班島嘅project，莫講話生仔大計受阻，連同老公見面嘅時間都甚少，佢話上月佢連續三個星期只能同老公見面半個小時，佢覺得畢竟女性應該以家庭為重，所以已向老闆提出請辭，佢話：「我同咗老闆講，叫佢唔好畀人工我，卸任我市場官嘅職務，我同上司好似朋友關係，有需要我會義務幫助市場部團隊前進，直至團隊穩定運作為止，塞班島呢個項目係非常好，我要做嘅嘢差唔多完，可以實行生仔大計。」佢又話將同老公去沖繩過情人節當作補償，實行沖繩造人之旅。
