政壇：兜巴星：抗生素零監管 星星靠害

全球畜牧業同醫療系統濫用抗生素情況嚴重，導致具抗藥性嘅超級惡菌為患俱增，世衞將其列為人類公共健康三大威脅之一。抗生素可隨排泄物排到水中，破壞生態環境，有學者發現本港河流抗生素濃度可比黃浦江同珠江流域，仲比長江口高出六倍。學者認為人類長期接觸抗生素，會增加抗藥性，分分鐘連普通病菌感染都無藥可醫，但本港環境保護署「零監管」，一直未將抗生素納入水質監測計劃，即係本港仲未有一套抗生素排放規管標準。環境局局長「星星」黃錦星對呢個問題闊佬懶理，簡直靠害市民，真係要兜巴摑醒佢先得！