政壇：拉布少落區 「帆」體揮春減
立法會議員EQ葛珮帆苦練八年書法自創「帆」體字，多年嚟都喺農曆新正頭落區為街坊寫揮春。但今年EQ就大呻因為泛民主派「拉布」，連累建制派被迫留守立會湊人數開會，少咗時間落區寫揮春，今年產量急跌囉！
葛珮帆出動「帆」體字揮春同大家拜年。
EQ尋日拉埋建仔沙田同西貢支部黨友舉行新春團拜，除咗祝願香港「唔好拉布」，亦乘機要求財爺派糖，包括減差餉兼退地租。講起「帆」體字，特色係字體粗線條而且圓碌碌，由「福」字，到「大吉」同「招財進寶」都好受街坊歡迎，EQ每年落區閒閒哋都寫番四、五千張揮春。
雖然EQ手寫揮春產量跌，但任內提出質詢次數就節節上升，佢話過去四年大家都聚焦佢打擊象牙走私活動，其實佢仲研究好多婦女同科技議題，包括爭取為女童注射預防子宮頸癌疫苗同成立創新及科技局。唔通EQ提早為爭取連任鋪路？不過，該黨最近興「普選」，要出選新界東又使唔使內部投票呢？
