政壇：搞搞政：對卿姐無禮 尹兆堅倒米

傳肥亨罷捐錢促道歉

今年正值選舉年，打選戰都要有「彈藥」，加上白鴿黨直選議席都唔少，預料花費驚人，捐款尤其重要。肥亨對白鴿黨一向相當有心，每年該黨黨慶兼籌款晚宴，佢都會捐出數以十萬元計嘅款項。據聞肥亨早前曾私底下向友人透露，因為不滿尹兆堅唔尊重前輩嘅言論，打算今年黨慶唔再捐錢，除非尹兆堅肯向卿姐道歉。

本報昨日致電向肥亨求證，佢證實確有此事，但強調同尹兆堅無仇無怨，只因卿姐點計都係黨主席及尹兆堅嘅前輩，睇唔過眼尹兆堅對前輩如此無禮，認為唔應該咁做，所以開出上述道歉條件，最終獲該黨「元老」張文光回覆，應承會喺黨慶當晚同一班後生仔上台，唱首歌送畀卿姐作為道歉。肥亨話如果真係咁樣做，佢就會捐錢。但當日佢不在香港，無論捐錢或唔捐錢，都唔會出席黨慶晚宴。

將告別議員生涯嘅卿姐，做議員前曾任電視台記者，三十年前曾身穿吊帶背心裙、手持咪牌出鏡，令唔少人為之驚艷。佢尋日同傳媒茶敍時話，有人建議佢趁今年黨慶兼籌款晚宴，再着吊帶背心裙表演，但佢認為太凍，擔心凍到面都黑而拒絕，但佢決定喺今年臨別晚宴上着背心裙同大家合照，笑稱一定唔會走大家數，更指自己一件衣服可着三十年，值得當代女性學習。