政壇：高官苦命 徒勞無功
繼批算多名行政會議成員同立法會議員嘅運程後，自然輪到政府呢個熱廚房「測溫」，其中商務及經濟發展局局長Greg蘇錦樑猴年「全年做咗嘢好似冇做咁」，意味多勞少成，甚至徒勞無功；以外訪聞名嘅教育局局長「吳得掂」吳克儉雖然「死好命」，但年尾就要避免去西北地區，否則會出現健康問題。
香港術數家協會術數師楊子東話阿Greg嘅八字「唔係咁硬淨」，有些少影響就會傾側，皆因佢屬丁火命，有如燈燭嘅火，易行好運亦容易飄搖，整個春季都唔如意，最好躲起來。農曆正月愈低調愈好，二月有機會被害，同事愈幫愈忙；三月有小人是非，四月多勞少成，五月就算幾勤力都做唔到成績。六月有不吉利的事，言語間會被人圍「插」，立秋後略有成績，八月開始好運，多做好事或有機會成功，九月亦有壓力，全年運勢反反覆覆。
吳得掂生於一九五二年屬龍，六十四歲，本身八字用神用火土，六十三歲開始行火土運，就算點樣做錯事，其職位仍很穩固，可謂「奈佢唔何」。佢正月出現舊年延續嘅小人是非，但工作穩如泰山，三月有少許成績，五月係全年最旺，六月有暗湧，宜低調。踏入立秋，講乜嘢都有瑕疵，企圖平反只會「愈搞愈喎」，八月仍徒勞無功，九月平平。十月開始現危機，十一月更出現忌神，要注意健康，特別要切記別往西北行，例如加拿大和英國，否則健康會出現問題，十二月先稍為轉好。
高永文好壞參半
至於食物及衞生局局長高永文，生於一九五七年屬雞，本命屬土，要用金用水，猴年是丙申命，一半為火，一半為金，即一半對他有幫助。頭半年運程平平，正月、二月多小人是非，三月有貴人，四月逢凶化吉，五月運程轉差，做好事都是徒勞無功。七月開始轉旺，八月為全年最旺，九月為戊戌月，可能與五月一樣差，十一月有轉機，能解決問題，十二月表面風光，但有暗湧。
