舊年以驕人成績喺藍帶廚藝學院榮譽畢業嘅Coco蔣怡，更喺年底將修讀課程時寫低嘅點滴集結成書，名為《Call Me Chef ! 蔣怡的藍帶成長日誌》。適逢新年，Coco同老公Dickson翁狄森及女兒「嗡嗡」翁容遊埠度歲，Coco話：「舊年農曆新年，自己一個喺倫敦唸書，今年終於一家人齊齊整整，好好地過！之前我哋都有全家一齊去旅遊，不過今次比較特別，我哋將會搭乘郵輪，去嘅都係東南亞國家，其中有越南、新加坡等地方。今次旅遊加起嚟嘅日子，都差不多有半個月，可以好好休息充充電，同多啲陪囡囡，以補償舊年冇陪佢度新歲！而且『嗡嗡』好喜歡動物，所以到訪新加坡時，已經安排好一定要帶佢去動物園同水族館，畀佢好好觀賞一下。佢好喜歡睇住啲魚游嚟游去，淨係睇魚都可以睇一整日o架！」

蔣怡一家度郵輪假期，會帶囡囡去動物園同水族館。

係咪刻意避年？Coco話：「都唔係啊！我同Dickson只係想趁大家都有假期，好好陪伴囡囡，同畀佢從小就認識世界上唔同地方嘅風土人情，所以一有機會就帶佢去多啲國家旅行。」

第一手消息請下載on.cc東網iPhone/iPad/Android/Windows Phone Apps