城中鏡：全城抗暴

小販檔味美 董吳玲玲籲保留

董吳玲玲諗起年輕時，放工會喺碼頭購買魚肉碗仔翅，食完會好滿足，希望可以有合適方法保留呢類小販。工業總會青委主席劉燊濤就話好鍾意篤魚蛋，但太太冇乜興趣，話讀小學時，學校管教好嚴，冇得食街邊嘢。健康快車香港基金創會主席方黃吉雯亦話細個已好注重健康飲食，又驚肚痛，所以好少食街邊嘢。

但原來身家豐厚嘅觀塘區議會主席陳振彬好鍾意食牛雜，但考慮到衞生問題，近年已甚少光顧小販檔。今個新年佢留港消費，除咗同家人去飲茶，仲同兩個仔打籃球，笑言趁兩個仔仲肯「黐」佢就「黐」多啲。

講起旺角暴亂當晚，有多間珠寶金行玻璃櫥窗被暴徒襲擊損毀，令唔少零售商戶擔憂保安問題。喺尖沙咀彌敦道開咗間名錶店嘅香港鐘表業總會前主席梁青華話，佢哋店面係用密封式捲閘，落閘之後，喺店外乜都睇唔到，加上收舖後，會將名錶收喺夾萬內，暫時冇咁驚。但佢好擔心香港有排亂，希望警方果斷行動，保護商戶同市民安全。