政壇：搞搞政：口舌招尤有血災 鄉事猛人未驚過

梁福元生於一九五七年，壬水命，忌火土，用金水，今年丙申年，火弱金旺，所以有運行。香港術數家協會術數師楊子東批算，佢喺猴年首四個月運程唔錯，但五月出現忌神，會講多錯多，若未能處理好小人是非，分分鐘會變官非，最好收起「牙擦」本色，而六月「家衰口不停」，即鄉里「令佢周身唔得閒」。若五、六月無惹官非，七、八月就會行好運，尤以八月大旺，但九月運勢轉弱，到十一月才能反勝。楊師傅話人太旺，就以為自己「好掂」，會有恃無恐，做事過界，應該慎言慎行。

化解災劫 侯：自宮都得

梁福元笑言，身邊經常都有小人，但母親教落「不招人妒是庸才」，即使身邊有小人，但身邊貴人更加多，對「小人」處之泰然，亦相信因果。但經楊師傅指點後，佢「會睇住啲小人，小心啲、檢點啲」。對於被指「牙擦」容易惹官非，佢笑言「冇『北面』嗰個咁牙擦」，未知係咪暗指身兼北區區議員嘅侯志強呢？佢自言只係比較「多口」，「講得多啲就牙擦，唔溝通又點知人哋諗乜？」

至於喺一九五六年出生嘅侯志強，甲木命，弱木，屬火月出生，要用水用木，忌火忌土。楊師傅批算侯志強猴年頭四個月運程都好，五月忌神出現，「如果亂嚟會好大鑊」，六月仍未可樂觀，七月更要注意健康，例如刀傷、氣管等問題。八月易有交通事故、刀傷或利器所傷，而九月會因財失義變新聞，十一月暢順平安，十二月平凡有福氣，所有麻煩事都能「過骨」。

侯志強形容有關批算「直頭係暗殺」，但佢明言「唔識寫個『驚』字」，所以會繼續勇往直前，又笑言會「自鎅兩刀」化解血光之災，甚至「自宮」都冇所謂喎。佢強調自己從商一向本着忍讓為宗旨，多年嚟從無試過因財失義，故今年亦唔擔心會有呢種情況出現，笑指自己一向「左耳入右耳出」，完全唔將結果放喺心上。八字命相批算，都係信則有不信則無，不必太上心。